سألت مالك الحزين، إزاي أحل مشكلة الآثاريين؟ وإزاي أكون دايما أمين؟
رد وقال : خد مني حل يرضي كل العاملين، ويقص رجل المتظاهرين، ويضحك المعتصمين، ويمسح دموع الحيرانين، ويحمي الموظفين.
قلت: ريحني بسرعة يا سيد العارفين.
قال: زود حوافز الثابتين، وارجع تاني للتأمين، وعين المتعاقدين، وأتعاقد مع السركيين، وشغل بأجر يومي الخريجين، وبكده تكونوا متصالحين، ولو عايز تزود الدخل، اجري ورا المقاولين، واتكل على ولادك المرممين، وازرع عندك مهندسين، وهات فلوسك من صندوق التنمية، و أوعاك تقول ضايعين، وابعت لمعارضك من أمناء المتاحف مرافقين، وبلاش مكافآت للعاطلين، واعمل تذاكر لمواقعك المنسيين، واعمل حفاير بفلوس أجنبيين تحت إشراف رجالتك الحلوين، ح ترضي الأثريين والأثريين ... ترضي اللي فيها عاملين، وترضي تحفك اللي من السرقة خايفين، ونهتف ونقول خليك على كرسيك على طول ليوم الدين، وبفلوس السايحين، "وكريا لايسون" وآمين، يعني يا رب ارحم واجعل كلامنا خفيف على السامعين، "كريا لايسون" وآمين ما هو على كرسي الآثار أمين،بلدنا كلها خير وإحنا اللى مش حاسين.
|