abou-alhool
abou-alhool
abou-alhool
abou-alhool
abou-alhool
abou-alhool الرئيسية abou-alhool
بانوراما
فرعونيات
بلاد وشركات
الحدث السياحي
سحر الشرق
سياحة وإستشفاء
أم الدنيا
حج وعمرة
أعمدة ثابتة
درجات الحرارة
اسعار العملات
abou-alhool
سامعانى يا أمى؟
سامعانى يا أمى؟
عدد : 02-2017
بقلم الخبير السياحى/ محمود كمال


ألو يا مصر ، أنتى سامعانى ولا مش فاضيالى أنا أبنك والله ولا الظاهر نسيتينى ، أفكرك بنفسى أنا اللى حبيت فيكى روحك الطيبة وأرضك الكريمة ولم أرض عنك بديلا ، يا ما كانت قدامى الفرص أنى أسافر واسيبك بس حبى ليكى خلانى ماسك في ديل جلابيتك ، ياما اشتغلت وتعبت علشان أخلى صورتك جميلة ويقولوا أنك فعلا ربيتى ، عملت حاجات كتيره علشان تفتخرى بى وسمعت شهادة كل اللى زاروكى وكمان كانوا دايما يقولولى مصر فيها حاجه حلوة وأنا أرد وأقول فيها حاجات وحاجات حلوة ، عمرى ما اشتكيت منك لانى عارف ان السبب مش أنتى ، بس ليه أخويا الكبير اللى معاه عدة التليفون مش بيرد على ، يمكن مشغول أكيد مشغول بس صلة الرحم واجبة ، أنتى عارفه إن ايمانى بالله كبير وبحبك بكل قطرة عرق في عز الصيف وتحت شمسك سالت منى على ارضك اللى بحبها والله من غير أفكر ، بس لأول مرة ألاقيكى بعيدة عنى ومش سامعانى ومش فارق معاكى ابعتلك رسالة او اشتكى ليكى ، ما هو لو على قد الشكوى ما يهمش إنما كمان بتعاملينى وكأنى مش إبنك والله ده كتير على أنى أنادى عليكى وانتى عنى مش مهتمة.

تفتكرى أروح أدور على أم غيرك ولا ناوية تضمينى ليكى؟.. والله عمرى ما رميت ورقة في شارع وكنت بحب اشوفك دايما بهية وياما حكيت عنك وكان كل مرة يقشعر جسمى من الحكايات وبالذات لما أكون مع ضيوفك اللى جايين من بلاد بره وياما بكيت لما الاقيهم حبوكى وقالولى انى ابن بار بيكى ، على فكرة اخواتى كتير زى واكتر منى بس ليه عن حضنك بيبعدونا وبيقولولنا انك مش فاضية ومشغولة ، أنا مستنى منك دعواتك لى وانا في صلاتى بادعيلك ينجيكى ويشفيكى ويخليكى لينا وفى حضنك تاخدينا ، دموعى غالية على، بس قدامك بكون زى العيل مهما كبرت ولا عليت انا تحت رجليكى عيل ، حاولت الاتصال بيكى وكل مرة جرس ومن غير رد ، مرة يقولوا أنك مشغولة ومرة يقولوا انك مسافرة ، بادورعليكى يمكن ألاقيكى ،ومستنى منك اشارة يمكن تنادينى، من زمان روحت اتعلمت انك حبيبتى بلا منازع وان فيكى الخير وربى قال عنك كلام كتير مهم وذكرك في قرآنه الكريم يا مصر يا أم الدنيا.

لو لسه في قلبك حب لى شاورى لى أجيلك ولو خلاص مبقاش لى عندك ود ، فأمرى الى الله يصبرنى ويعينى على فراقك.مش هطول عليكى اكتر من كده ،يكفنى انى قولت لك اللى جوايا ومش عارف ان كنتى سمعتينى ولا فعلا لسه مشغولة؟ .. ياريت تظهرى حتى على اى قناة واشوفك وتفتحي لنا الخط ونكلمك وتكلمينا من غير عصايا ولا كلام يوجع.

صحيح الامل جوايا طول عمرى وبفضل الله فضل حبك جوايا طول عمرى بس خايف انى اموت من غير ما اسمع صوتك زى طول عمرى. وحشتينى يا امى وحشتينى يا مصر..وهتوحشينى لما أسيبك وأمشى وفى قلبى حسرة لأنى فعلا بحبك.

ياريتك توصى أخويا الكبير ما هو اللى بيتكلم بالنيابة عنك وقولي له انى برده ابنك من نفس البطن جيت وفى نفس الأرض رايحين وان يوم الحساب عند ربى مش بعيد وواجب عليه يساعدنى بدل ما يشغلنى عنده بالاجره رخيص ده الملك ملك الله والأرض أرض الله مش هوصيكى على وعلى أولادى ، دايما بقولهم انك حبيبتى وياما لعبنا وجرينا في غيطانك وعند الهرم وأبو الهول اتصورنا وفى الفلوكة هيصنا وقدام المدرسة يا اشترينا عسلية وسمسمية ودرة مشوية ..ياه يا أمى مش ممكن انسى لحظة نجاحى وانتى فرحانة وفى حضنك بتخدينى وبالكلام الحلو بتشحعينى .. ياه يا أمى كنت بسمع كلامك على طول وكل كلمة قولتيها كانت حلقة في ودنى.. ياه يا أمى كنت شايفك قدامى وجنبى وسامع صوتك بيرن في ودانى.. ياه يا أمى نفسى أسمع صوتك تانى وتخدينى في حضنك من تانى .. ياه يا أمى لما كنتى بتعاملينا كلنا زى بعض مفيش حاجة اسمها كبير وصغير ولا بعيد وقريب.. سامعانى يا أمى ؟!!