abou-alhool
abou-alhool
abou-alhool
abou-alhool
abou-alhool
abou-alhool الرئيسية abou-alhool
بانوراما
فرعونيات
بلاد وشركات
الحدث السياحي
سحر الشرق
سياحة وإستشفاء
أم الدنيا
حج وعمرة
أعمدة ثابتة
درجات الحرارة
اسعار العملات
abou-alhool
نفرتيتى تخرج عن صمتها من برلين
نفرتيتى تخرج عن صمتها من برلين
عدد : 03-2020
كتب/ اشرف سركيس
البحر الاحمر

الو – ايوة- يا عنانى – ايوة يا ولدى – ايوى هو انا متستغربش - انا جدتك نفرتيتى بكلمك من برلين
ازيك يا ولدى- ولا كبرت وبقيت حاجة تشرف وتفرح بتفكرنى كده بعبد الحليم نور الدين والله حاسة كمان انك شبهه بس انت لمض وشقى عنه حبتين

زعلت اوى على ابوكم على رضوان شيخ الاثريين ربنا يرحمه ويرحم الحبايب الغاليين وغيرهم من ولادى المخلصين وتمللى بفتكرهم بكل خير

طمنى ازاى زاهى واخبار صحتة ايه وحشنى ولدى الشقى العجوز ابو برنيطة زى الخواجات واللى مبيغبش عنى لحظة
بس الحق اقولك الواد مصطفى وزيرى ده حدوتة ومبسوطة منه اوى ويا عينى مبيرتحش وداير يدور بنفسه على اهله وناسه وبقية الحبايب فى كل حتة فى الصعيد الجوانى عشان يجمعنا من تانى بس عاتبة عليه انه مجاش زارنى وبص عليا ولا حتى بيسال من بعيد
متفائله بيك اوى وبحب وشك الجميل المبتسم وحاسة يا ضنايا انك مش زى اللى قابليك وانك مش هتيجى تبص عليا وتسيبنى وتمشى وانك مش هتيجى تتصور سيلفى معايا وتبتسم فى وشى وتضحك عليا وتقولى اصل هنا احسنلك وصحتك جاية على جو برلين ووشك زى القمر وملكة جمال زى ما انتى ومتغيرتيش

ايوى اضحك عليا بكلمتين يا واد ده انا خبزاك وعجناك طب ده حتى اللى واخد عقلك وقلبك وملكش سيرة غيرها اليومين دول بنت رمسيس التانى الجميلة ام ضفاير مون ميريت وضبطها فى الغردقة احلى تظبيطة

أنا شيخت وزهقت من غربتى بقالى سنين ياما هنا ورقابتى بقت وجعانى وعينى ملتهبة ومبقتش بشوف كويس ومحتاجة ارجع اقعد فى شمسى الدافية واشرب من حابى النيل واكل من الارض الخضراء الطيبة

ومتاكدة واحساسى يقين بانك الوحيد اللى تقدر تشيلنى على كتافك وترجعنى للبيت الكبير ولمة العيلة زى ما شيلت ولاد وبنات العيلة وطلعتهم من نومهم وتوابيتهم من كل حتة وكرمتهم وكل الناس بعد كل السنين دول شافوهم واتعرفوا عليهم وبقوا بيزوروهم

حقا يا واد انا سامعة ان الريس السيسى ولدى البطل عملنا بيت كبير ودوار عالى جنب الاهرامات يساع من الحبايب الوف وداعى كل الاحباب والاحفاد والاخوات والعمات والخالات والولاد والبنات عشان يتلموا فيه ويسكنوا ويعيشوا مع بعض من تانى فى طيبة الجميلة الرائعة

طب يرضيك بقا كلهم يتجمعوا معاكم . وانا متغربة لوحدى هنا والناس اشكال والوان جايين يزورونى بس هما مستغربنى وانا مستغرباهم ولا شبهى ولا منى ولا حاسين بيا ولا عارفة دول يبقوا مين ولا عارفة اية اللى جابنى هنا

وحشنى اوى جوزى اخناتون وحنيته والواد توت عنخ ورقته ووحشنى المصريين احفادى كلهم

اطلب من الست ميركل والريس فرانك فالتر بتوع المانيا انك هتخدنى وقولهم انى انا اللى بطلب امشى من هنا . وانشالله حتى ارجع مصر شهرين اقعد فى البيت واشوف الحبايب واستقبل الغاليين اللى هيجوا يزورونا وينورونا ما هو انا الكبيرة اللى لازم اكون فى استقبالهم

وانا يا بنى لا محتاجة تاشيرة ولا باسبور- انا ملكة مصر وحكمت بعزة قبل التاريخ بعصور

يلا اجهز وتعالى خدنى ومش هتعبك ومعنديش شنطة هتشيلها واحنا مسافرين

بس انت يا بختك هتشيل تمثالى اتقل حمل واجمل حلم تمثال ام كل المصريين